Khadi Rahi...

Meri tarah tere intezaar mein ek shaam khadi rahi Dard se nikalti huyi yaadein bhi tamaam khadi rahi

Ek talism-e-aab ke saath dasht-o-sehra me sisakte Ajab haal mein lete deir tak tera naam khadi rahi

Faqeer-e-ishq bani toe kabhi na-mukamal ghazal si Main tamasha-e-ishq ban yunhi sar-e-aam khadi rahi

Aayino se kar ke parda dekhe kabhi khwab-e-wasl Yaad ki zhanjiro se bandh kar gumnaam khadi rahi

Shareek-e-dard jaane kon tha meri tanhaiyon mein Kis ke intezaar mein chor ke sare kaam khadi rahi

Janha tum se bichadne ka khud se waada kiya meine Ussi andhere kunche mein tanha si benaam khadi rahi

Mehfile sajti rahi, tanhaayi bajti rahi raat bhar Main apne gamo ka le kar ek aakhri jaam khadi rahi

Raat bhar tutti huyi neendein badan nochti hi rahi Main dard se tarbatar le kar dil-e-nilaam khadi rahi

Written By Ritu Roy - Copyright Reserved (Written On 15th Oct 2015 - Thursday 12:30 PM)